 |
حكـــــايتى
حكايتى حكايه مش عاديه
لاهقول اسمى ولا عنوانى.. ولا كان ياماكان يابن بهيه
وابن بهيه دا واد مجدع يخرج للعسكر ويقول لااا بصرخه قويه
*** *** ***
اجرى واقول عاوزه اصرخ زيه ياجدعااان
اصرخ.. اهتف.. أنادى.. ياعالم ياهوووووووو.. أنا الميدان
"قالوا "اكتمى.. صوتك عوره موش ناقصه جنان
قلت طب مش صاارخه ..طب انزل وياكو الميدان
امسك لوحه.. ارفع يافطه.. اعبر عن طلباتى ف كلام مكتوب بالألوااان
ردوا وقالوا هى بهيه مات منها الولدان ؟؟!!
*** *** ***
....قلت ياجهله !!!
مين قال ان الحق له جنس وهيئه وشكل ولون ؟؟؟؟!!!!
ربك فرضه على كل موحد بإله الكون
"والنص صريح "كتـــب عليــــكم
"قولى ياسيبويه ايه جنس "عليكم
*** *** ***
النص صريح مافيهوش تأويل ..الثوره دى حقى زيي زى ابن بهيه
وهصر على نزولى وهشارك ..وهحرر بلدى من عسكر ويا الحراميه
ومسيري ف يوم استشهد ف ميدان الحريه
وانا رافعه السبابه ..ولسان بلفظ بتحياتى لبهيه ..وابن بهيه
واقول سلاااام يابلادى ..عيشى من بعدى عيشه هنيه
وابقى افتكرينى ..انا كنت ف يوم ثائره للحريه
بــــراء نجـــــاتى
