its easy

اعتقد ان اسهل طريقه للقضاء ع الاميه خلال عشرين سنه مثلا اننا نهتم بالجيل الناشيء شويه ونسيبنا م العواجيز مع كامل احترامى ليهم والله بس مسيرهم يموتو :)
مش كل مره نتعب نفسنا مع اجيال خلصت وننسي اطفال الشوارع وكمية التسريب والهروب م المدارس ف الجيل دا واللى جاى
نعمل رصد بأعمار واعداد الاطفال اللي مش متسجلين ف المدارس واتخطو سن ال 6 او 7 سنين ونعمل لهم صفوف مخصصه ليهم ف كل مدرسه
ونهتم بالمواد الدراسيه بعيدا عن الحشو بحيث نخلى الطلاب يحبو مدرستهم ونحببهم ف المدارس من خلال الانشطه والمسابقات
ومش شرط مسابقات تعليميه عشان منبقاش بنتكلم على المتفوقين او متوسط الطلبه ونهمل الباقي
ومش لازم الطالب يمتحن ف كل اللى درسه .. كفايه يطلع من السنه الدراسيه بكام معلومه بس فاهمهم وشايف لهم تطبيق عملى ف حياته 
نشوف اعادة تأهيل للمعلمين اللى بتضرب الطلبه او اسلوبهم مش تربوي
نشوف نظام لاعادة هيكلة المدارس والتعليم وهنلاقى الموضوع كله خلص خلال عشرين سنه مثلا
مش بقول نجدد لا سامح الله ولا نتعب نفسنا ونفكر لالا احنا بس نحاول نقلد مدارس اوروبا وهتتحل المشكله
والتجديد مش ف المباني ولا ألوان الفصول والزي  المدرسي "uniform" 
التجديد ف الآليه والرؤيه نفسها 
الموضوع مش محتاج ميزانيه كبيره عشان نحققه 
محتاج ناس عندها ضمير واجهزه رقابيه تتابع اداء كل موظف ف هيكل التعليم 

‪ #‎its_easy‬ 

_ بـــــراء نجاتـى _

أشكيـــك لميـــن ؟!!

 

أشكيك لمين وانت الحكم !
دمي مغرق الميادين والحق اتكتم !
ناس تعبانه شقيانه
ع العدل والتغيير حيرانه
قاموا بثوره لاجل ماتيجي
لاجل يشوفو حلم حقيقي
حلم بسيط يتعد بخمسه
(ت غ ي ي ر )
ولا فيه غيره علي لسانهم
...
ثاروا وصبروا وضحوا وملوا
من حكمك وقرارك طفشوا وكلوا
...
شافوا صلاتك قالوا شيخنا ومولانا ..
يحكم بشريعته يرجع دم غلانا ..
لا دم بيرجع ولا بيودي
شلال بيجري ولا بيهدي
ولسه ف عينهم (الهادي المهدي) !!
ياهادي ليك عليا حقين .. حق طاعه وتقويم وليا عليك ألف حق وحق ..
هبدأهم بدم اللي ضحي بحق
لاجل ماتيجي ونفاوضك علي حقه تقولنا لاء !!!
...
وانت بتصلي وبعد الفاتحه اقرا الآيه : (تلك حدود الله فلا تعتدوها) ..
واضحه مفيهاش لف ولا روايه..
دم بدم .. وعين بعين .. والجروح قصاص ..
ودا حقي الأول .. ياتجيبه بنفسك ياتسيبني أجيبه
دم اخواتي ومش راح اسيبه
ولو هتسيبه مش هنسيبك ومش هنسيبه

عبدالناصر ... لا أفضل من أن أنعيك بأفعالك

_استلم مقاليد حكم البلاد التى تضم مصر وغزه والسودان وترك مصر بدونهم

  بل وجزءا منها _سيناء_ تحت حكم الاحتلال

_استلمها بناءا على استفتاء شعبى مزيف دبره له أعضاء المجلس الانتقالى حينها

  ليتفرد العسكر بالسلطه دون المدنيين

_وعد بتسليم السلطه للمدنيين خلال 6 اشهر وأخلف وعده

_عزل محمد نجيب لعزمه على تسليم السلطه لايدى المدنيين وامر بإلقاء القبض عليه من قصر الرئاسه

_بفضله أدخل البلاد تحت حكم العسكر لمدة 60 سنه واحسب عدد شهدائنا من حينها الى ثورة يناير للتخلص من حكمهم

_ألغى الحياه الحزبيه فى مصر

_حارب المفكرين والاسلاميين فى عصره

_عذبهم فى السجن الحربى

_افسد الزراعه واعطى الاراضى لفقراء عديمى الخبره بأمورها تحت دعوى الاشتراكيه والاصلاح الزراعى

_طال بتعذيبه نساء عصره أمثال الاستاذه زينب الغزالى والاستاذه حميده قطب وكثير غيرهن فى سجونه؛ بالكلاب والكهرباء والاعتدائات الجنسيه عليهم

_ترك أعوانه (عبدالحكيم عامر وصلاح نصر وغيرهم ) يعيثو ف الارض فسادا

_كانت تتنافس الاجهزه الامنيه (البوليس الحربى والمخابرات وغيرهم)على إرضاءه فى تعذيب المفكرين وجميع المنتميين لاى تيار اسلامى او دينى او فكرى مثل الشيوعيه وغيرها

_كان يجبر الفنانين والملحنين (امثال عبدالحليم حافظ  والموسيقار محمد عبدالوهاب ) على تأليف الاغانى باسمه والمدح فى انجازاته وشخصه

_رحب بالبطله الجزائريه جميله بوحريد واستقبلها فى المطار ف حين انه يعتقل ويعذب أمثالها ف السجون الحربيه

_ولا تسأل عن صلاح نصر (افسد خلق الله) رئيس جهاز المخابرات العامه لمصر ..

ممكن نقول عنه موقف بسيط من افعاله " كان بيجند الممثلات لعمل المخابرات والجاسوسيه دون ارادتهم "

وعن قصة زواجه من اعتماد خورشيد " اجبر زوجها على تطليقها وعقد عليها وهى حامل وفى فترة عدتها "مخالفه شرعيه جثيمه" بدون إرادتها ،

ومن ضمن مواقف الرجوله اللى حب يوريها لها :اخدها على السجن الحربى ومسك مسجون سياسى وحطه ف برميل مياه نار المسجون ف دقائق تحلل لحمه وظهر عضمه اعلى البرميل "

_وأخيرا لمن أراد المزيد ... اقرأ كتاب "البوابه السوداء" للاستاذ: على جريشه 
للتمعن فى خبايا عبدالناصر وغيره
حقا كما قال العندليب :
"""الوداع ياجمال ياحبيب الملاييــن .. ثورتك ثورة كفاح عشتها طول السنيـن """

ألا لعنة الله على عبدالناصر وأعوانه  

سد ودانك

عندنا خطيب جمعه ... كبير ف السن وصوته عذب وطريقته مستساغه وهاديه مش زى الشيوخ اللى بيزعقو ليل نهار ...  ومخه ماشاء الله ف العلوم الشرعيه والفكريه كمان

وخاصة لما يربط بين معانى الايات وأسبابها ..الخ؛ "شيخ مبدع من الاخر"

دايما كان بيقول كلمة الحق بس مش اوى يعنى :))

مثلا لماقامت الثوره كان بيقول انها تخريب وافساد وان شبابها شباب طايش ومش هما اللى هيحددو مصير البلد على مزاجهم وكل ماتحصل حاجه يجبها ف الثوره ..الخ؛ لكنه فرح جدا انه هيرشح حد للرئاسه قبل مايموت وازاى ان ربنا ابدلنا بعد الغم بفرح عشان صبرنا وواجهنا الطواغيت !!! D:  _كان شيخ ثورى من الدرجه الاولى :)) وطبعا كلامه ماشى على مزاج العواجيز اللى مابيحبوش التغيير او الحركه اصلا الا من السرير للحم...* ومن الحم..* للسرير :))) _

"

بيعرف يسحر اللى قدامه بالدليل والبرهان ؛ مثلا خطبة النهارده كان بيتكلم عن مبدأ الحريه ف الاسلام وازاى ان الاسلام هو الدين الذى أرسى قواعد الحريه وضوابطها وهو اللى حث الناس عليها ...الخ

كلام جميل خاصة لما يبدأ الموضوع من بداية خلق الانسان ومواقف تحرره مرورا بمبدأ الشورى من أيام الرسول لحـــــــــد عرابى  لما قال للخديوى احنا مش تراث ومش عقار ..الخ

"

تحس ف نفسك :انــه ايووووووه الحريه دى اتخلقت عشانا احنا ... وعمرنا ماهنفرط ف حقوقنا ولا فيهااااااا :)) .. وكوكتيل الثورات العربيه شغال جواك هههههههه لحد كده الراجل شبعك بأهمية الحريه.

"

..يبتدى بقه يسرد أمثله من الواقع عليها ... الحقيقه كلها امثله سلبيه تكرهك ف الحريه وتبين مساوئها وضررها الجثيم  فى مقابل منافع وايجابيات غير ملموسه وقليله جدا (على حسب كلامه )  _زى مثلا لولا الثوره والحريه ماكنتش حصلت مجزرة بورسعيد!! ،فحين انه ايام المجزره خطب وقال" دول شوية عيال مخربه ضيعت عمرها هدر " وقعد يشرح وينظر ف تكوين وأصل تنظيم الاولتراس :))) الحقيقه لازم تحس بالذهول من خبرته اللى ف كل حاجه تقريبا " عجوز بس مدكن" D:

وينهى خطبته بالدعاء : (اللهم أرنا الحق حقا وارزقنا اتباعه وأرنا الباطل باطلا وارزقنا اجتنابه )

بالتالى وانت بتأمن ع الدعاء ف بالك ان "أرنا الحق وجنبنا الباطل" يعنى جنبنا النتايج السلبيه اللى مش جايه غير من ورا الحريه ... يعنى اللهم العن الحريه واحرقها بجاز عشان مافيش بنزين D:

"

"

النوع دا من الشيوخ عنده قدره على تلوين الكلام وسحر عقول عامة الناس بطريقه عبيطه ...

اعتقد ان وجوده هو كام واحد زيه كمان ف أى منطقه سبب كافى اننا نرجع تانى لمرحلة الخمول اللى كنا فيها قبل الثوره وشايفين العيب والظلم والحرام وواقفين محلك سر .

خلص كلامى … انى داع فأمنوا خلفى بقلوب خاشعه : "اللهم أرنا الحق حقا وارزقنا اتباعه وأرنا الباطل باطلا وارزقنا اجتنابه وماحدش يحضر للراجل دا تانى ياجدعان D:

رسائل سلبيه

بداية الاحتياج  للاعلام بشكل عام او للسينما والدراما بشكل  خاص هو الاحتياج لنقل وسرد مشكلات المجتمع بصوره مبسطه تساعد المشاهد على ايجاد حل لمشكلاته او تقديم الحل مباشرة دون امتهان لعقلية المشاهد او فكره او معتقداته

..

دا كان الهدف من الدراما ..وعادة اى فيلم بيكون له هدف معين المفروض يراعى فيه النقط والمعايير اللى قولناها لكن للاسف بيحيد عن بعض النقط على حساب التانيه

كمثال سهل وسريع : فيلم لبنانى حائز على عدة جوائز عالميه كفيلم يناقش الفتن الطائفيه فى لبنان  ..باعتبارها ازمه عقيمه لا يوجد لها حلول مؤثره على ارض الواقع ... الفيلم بيتكلم عن ان الفتن لما بتقوم الرجاله هما اللى بيقتلو وبيضخمو الامور والنساء ملهاش ذنب ف كده

من هنا هيبتدى النساء يشغلو الرجاله عن الفتن دى بطرق كتيره ..منها ايجابى بقدر محدود جايز بيقتصر على الدراما ومنها السلبى او اللى بيأثر سلبا على المشاهد ..كمثال ايجابى ان النساء يتفقو يقرو الجرايد اليوميه بدرى قبل الرجاله ولو لقو فيها اى نزاعات بين الطوائف يحرقو بسرعه الجرايد قبل الرجاله مايقروها ويدورو ع اى سبب لاختفاء الجرايد _طبعا دا حل وقتى وممكن لايتعدى حدود الفكاهه والدراما _ من ضمن الطرق الايجابيه الاخرى : مشهد بيعرض ان اهل الضيعه (مصطلح لبنانى للقريه الصغيره ) بيتفرجو على التلفزيون بشكل جماعى واحيانا الرجاله بختارو قنوات اخباريه _ودا طبعا ضد مخطط النساء وهدفهم للاصلاح _ هنا يعترض النساء ويفتعلو مشاكل بصوت عالى عشان ماحدش يسمع النشره الاخباريه وبالتالى ينجحو للمره التانيه ف حجب الرجاله عن اخبار الفتن

.... كل دى طرق جميله فيها شىء من الفكاهه والمتعه الدراميه قد لا تمت للواقع العملى بصله :))

ندخل على الجانب السلبى من الطرق اللى الفيلم عرضها  : ان من ضمن محاولات النساء لحجب وشغل الرجال عن الفتن ؛ انهم يجيبو عفوا راقصات اجانب لشغل الرجال عن واقع الفتن

طبعا دى رساله سلبيه تكفى لتدمير مبادىء كتيره وهدم وامتهان لكرامة كل من الرجل والمرأه لكن الرجل بشكل اكبر

لما تختزل قدرات الانسان اللى ربنا كرمه بيها وأعلى من ذكره وشأنه وفضله بنعم كتيره زى( العقل والتفكير والقدره والحكمه والرزانه وغيرها من نعم ) لمجرد انك تعامله ككائن بيولوجى اوحيوان انت كده زهدت من قدره ومكانته بالنسبه للمشاهد وبكده بتوجه رساله سلبيه للطرفين ف وقت واحد … بتوجه للمرأه او البنت ان الراجل دا عباره عن_ عفوا_ حيوان غير قادر على التحكم فى ذاته ومتطلباته وبالتالى اى مرأه عاوزه تعمل اى حاجه ممكن تكسب الراجل من خلال النقطه دى او تعامله من خلال لغة البدن بمعنى اوضح … ودا تقليل رهيب من قدر الرجل فى عين المرأه …

الامر التانى التقليل من وضع المرأه باعتبارها بتساوم بنفسها او بشكلها على طلباتها !!

…

للاسباب دى ماذكرتش اسم الفيلم _عشان مانروجش لوضع خاطىء_
 ف نظرى ان فيلم زى دا المفروض كان يتلغى منه مواضع التقليل اللى اصاب بيها الطرفين على حد سواء قبل عرضه

وف حالة عرضه بالمواضع دى ماكنش المفروض ياخد الجوايز دى كرد فعل طبيعى  ع سلبياته

…

نرجع تانى ونقول ان الفيلم بكده أخل بالمعايير اللى بتحترم عقلية ومكانة المشاهد اللى ربنا وضعه فيها

من هنا محتاجين نرجع للهدف ونبعد عن الحشو المخل .. محتاجين مخرجين عندهم قدر من السمو ف التفكير والعرض

محتاجين مشاهد واعى للرسائل اللى بتتوجه ليه ..وينقدها ويرفضها او يطالب بتعديلها من خلال استطلاع لاراء المشاهدين بعد المشاهده ..

دا كلامى اللى كنت عاوزه اقوله واتمنى اننا نفعل ادوارنا تجاه اعلامنا باعتباره بيعبر عننا

واتمنى ان الهيئات المختصه زى هيئة الرقابه على المصنفات الفنيه والمخرجين وكل القائمين على انتاج الافلام والمسلسلات يراعو نقد المشاهدين وياخدوه فاعتبارهم ويحسنو الاداء بما يناسب عقلية المشاهد .

_بــــراء نجــــاتى_

براء وهى صغيره 1

\

• 
  

• من وانا صغيره وانا بحب الشغب والهزار خاصة ف المدرسه ..

  ماكنتش اقدر اقعد 10 دقايق ع بعضهم ف مكان ثابت 

  اهزر مع حد اخطف حاجه م التانى اشاكل ف التالت ...

   ماكنتش بعدى يوم الا وانا ضاربه حد ورايحه للمدير 

   لدرجة ان بقه اى حد يحصله اى حاجه يقول براء اللى عملتلى كده D: 

  ف مره كنت ناسيه (الزمزاميه) بتاعتى ف التلاجه وجت بنت وقعت ع وشها 

  قالت دى براء ضربتنى بالزمزاميه ف بؤى هههههههه

   وانا يعينى كنت بريئه ساعتها وحسيت بالظلم اوى ..

  فكركو سكت ؟!!

  رحت وضربتها طبعا ازاى تفترى عليا بحاجه انا معملتهاش ههههههههههه !!!!

• مره تانى_ كنت ف اولى ابتدائى _عملو انتخابات الرائد ف الفصل

   وطبعا اترشحت وللاسف من كتر ماكنت بضرب اصحابى مخدتش غير صوتى 

  وبقه الفصل كله يطلعلى لسانه ونجحو صاحبتى عليا:(( ..

   المره دى بجد ماتتنسيش مسكت الفصل كله ضربته (بمعنى كلمة كله فعلا)

   وكان فى واحد بيجرى منى ومش عارفه اطوله 

  ههههههههه اول ماطولته هريييييييييته ضرب :)))

• 
  

• ويااااما ضربتهم بسبب انهم اكبر منى بكام شهر كده :))) واقولهم لا انا اكبر طبعا

• ..

• ..

• كنا مره قاعدين ف الفصل وجالنا مدرس لطيف بتاع رسم اول مره يدينا حصص ... 

  وقالنا حد يقوم يمثل مسرحيه قومت انا وكذا حد تانى

• كانت المسرحيه بنمثل فيها طلبه ومدرس ههههههههههههههه 

  طبعا كنت انا المدرس ..

  والمدرس الأموور الجديد ميعرفنيش فقالى انتى تمثلى دور المدرس 

  والعيال قعدو يقولولو لااااا يااستاذ والنبى دى بتضرب جامد اووى 

  .....وهو يقولهم لا لا براء بنت كويسه متعملش كده

   ويبصلى وانا طبعا اموره وببتسم بكل براءه D: 

   ... بدأت المسرحيه بمشهد انى بعاقب زميلى لانه معملش الواجب

   والواد يحلفنى انى مضربوش وانا اوعده واقوله والله مش هضربك يابنى ههوش بس 

  ..الولد دا كان لما يخاف وشه يحمر اوووووى

• المره دى كان وشه اسووووووووووود ههههههههههههه 

  بس انا وعدته انى مش هضربه وفعلا قعدت اضرب فيه والواد يصـــوت ههههههههههههههههههههههههههههههههههههههههههههههههههههههه 

   مش قادره انسى الموقف دا وربنا ههههههههههههههههههههههه 

  __

  كانت طفوله بريئه :)

• 
  

• 
  

مجـــــــرد لـمحــــــــــه

ف رمضان من الطبيعى او كنوع من الاحترام لحرمة الشهر ان صفحات الانترنت ماتنشرش صور غير ملائمه عن البنات او غيره .... (دا كنوع من الاحترام او الادب ) .. لكن للاسف بيحصل العكس ومش لاقيه تبرير لكده !!

من ضمن الحاجات اللى مش بلاقى ليها تبرير اوتصنيف واللى عاوزه افهمه من دعاة الحريه للمرأه والمساواه _بعيدا عن شهر رمضان او غيره _  : يعنى  ايه تناضل لخروج المرأه سواء للعمل او لأى سبب ولمساواة حقوقها بحقوق الرجل وانت ف الاول وف الاخر لا تنظر لها سوى من حيث المظهر ؟!!!

لما تبص ع الاعلانات تلاقى صورة بنات ذات مظهر ومواصفات معينه  !!!

 المسلسلات او الافلام لازم نوع من  _عفوا_  العرى او التكلف ف المظهر

وحتى لو بصيت للحياه العمليه مثلا اعلان وظيفه ف شركه .. تلاقى الاعلان بكل صراحه بيقول (حسنة المظهر) !!!!  ....
"

ً سؤال هو انت عاوز خبره وكفاء ولا عاوز ديكور !!!!! 

ًً من ضمن المشاهد اللى بتدايقنى انى لما ابقى انا واخويا عاوزين مثلا نوقف تاكسى او نقضى اى مصلحه من نوع ما ؛ وتلاقى الموظف او سواق التاكسى بيقف او بيخلص المصلحه للبنت_اللى هو انا_ ومش بيقف لاخويا ولا بيخلصله ًً  نفس المصلحه  ًً ..بينقى النساء او البنات دون الرجال او الشباب _مش لمجرد انها خدمه للنساء او البنات ؛ لا دى حاجه تانى   _

"

اكيد انا مش ضد حرية المرأه ولا خروجها للعمل ولا ضد اى حق من حقوقها ..لكن لما تخرج للعمل او تشارك باى شكل ف الحياه العمليه ع الاقل احترمها واحترم عقلها ... مش كل حاجه المظهر او الشكل   ...

لو مش متخيل المشهد اللى بحكيه تخيل انى لما هشوفك تتقدم لوظيفه لو مظهرك او شكلك مش (...) مش هقبلك ف الوظيفه وطريقة كلامى معاك هتبقى واقفه لكن لو انت شكلك او مظهرك لائق ومميز انا هحترمك اوى وكل طلباتك اوامر ....

"

"

قبل ماتدعى لخروج المرأه وحريتها شوف هتعاملها ازاى 
وهتبصلها ازاى _من حيث عقلها ولا من حيث مظهرها وشكلها_ وبعدين ادعى  ... وافتكر انك بتتعامل مع عقل قبل اى حاجه

_بـــراء نجــــاتــــى _